الحاجة الما عارفنها انتوا ..قالوا اتير توماس قاصد يعطي بكري المدينة كورة هو والقون عشان يحرجو ليك قدام المريخاب
“””””””””””””””””””””””””””””””””””
انت يا بكري المدينة الـ (3) مليار الادوك ليها ناس المريخ فيها مليار ونص (قصب)
“”””””””””””””””””””””””””””””””””””
محامي سويسري لي بكري المدينة ليه يا كاردينال ؟…انت عاوز تجيب لينا جمال الوالي الهلال
“””””””””””””””””””””””””””””””
علاءالدين يوسف ..الزول الما عندو شغلة بالكورة …جاب ليه قون في الهلال من مخازن السكر وبكري بيضيع في الفرص
“””””””””””””””””””””””””””
• بعد مباراة قمة درع الاستقلال ..قلت يا ريت الفيفا ما تقبل شكوى الهلال لبكري المدينة.
• جاني إحساس غريب كدا.
• فتح الباب ..وقعد.
• شعرت ليك ان تسجيلات الهلال الماضية ..احسن حاجة فيها …انتقال بكري المدينة للمريخ.
• دي الخبطة الحقيقية.
• بعد ما شفنا البعمل فيه بكري المدينة في مباراة القمة …وصلنا الى قناعة تتلخص في اننا (غرامة) ما عاوزنها فيه.
• قرش فيه ما عاوزنو.
• عفيناه لله والرسول.
• خلوه ..ما في احسن من البعمل فيه بكري المدينة في المريخ الان.
• يشيل ويضيع في (الكور) تقول ممتحن امتحان كيمياء.
• الـ (800) مليون … ذاتها خلينها ليه ..(كرامة) على انتقال بكري المدينة من الهلال.
• هو عليكم الله في احسن من كدا.
• الزول دا كتل المريخاب بالمغصة.
• يوم بتشقكم فرصة ضائعة.
• انتو يا هلالاب عاوزين شنو اكتر من تشوفوا بكري المدينة في المريخ يضيّع في (الفرص)؟.
• متل البقالة البتكون ناصية ..طول وعرض في الشارع.
• شغالين فيها (5) اشخاص.
• البقالة دي تمشي عليها تقول عاوز (طحنية) ..يقولوا ليك مافي.
• تمشي تقول عاوز صابونة ..يقولوا ليك مافي.
• تمشي تقول ليهم عاوز زيت.
• يقولوا ليك مافي.
• تمشي تقول ليهم عاوز سكر يقولوا ليك مافي.
• طيب يا شباب انتوا قاعدين لي شنو؟..خمسة انفار حارسين ليكم (بقالة)..لو مشيتو الجيش كان رجّعتو القدس.
• الواحد فيهم طول وعرض ..وما بعرف يقول ليك حاجة غير مافي.
• هسع بكري المدينة شغال بي نفس النظرية.
• يصل المرمى ..ويقول ليهم مافي.
• مفروض بعد مباراة القمة – الكاردينال يدق صدرو ويطبق لي بكري المدينة الحافز.
• ادوه تاني (800) مليون عشان بس يستمر مع المريخ.
• اصلو ما عاوزين اكتر من كدا.
• بعدين انت يا كاردينال ..القال ليك منو الزول دا عاوز ليه محامي دولي او محامي سويسري او فرنسي.
• فرنسي في شنو؟.
• انت الناس ديل عاوز تقلع منهم الاستاد.
• محامي سويسري لي بكري المدينة.
• ليه؟.
• عاوز تجيب لينا جمال الوالي الهلال.
• محامي على شنو؟.
• الموضوع اصلو ما بيستاهل ولا بيستحق.
• المحامي السويسري لو شاف البعمل فيه بكري المدينة دا ..بقدم استقالتو ..وتاني يحلف ما يشتغل في (المحاماة).
• شوفوا ليكم محامي من (السوق العربي) – القريب دا…ومسكوه القضية.
• والمحامي ذاتو ما تشوفوه محامي موثق للعقود ..الموضوع ما بيستاهل.
• محامي تحت التمرين كفاية.
• تحت التمرين ذاتو كتيرة على بكري المدينة.
• شوفوا ليكم طالب من طلاب القانون بقرأ في السنة الاولى او التانية على احسن الفروض.
• نحن ما عاوزين نكسب القضية.
• القال عاوزين نكسب القضية منو؟.
• ولا عاوزين بكري المدينة يرجع للهلال قروشو.
• في زول بتخلص ليه من حاجة ..يقوموا بعد كدا يدوه قروش.
• شوفوا ليكم (محامي) عشان بكري المدينة يستمر مع المريخ.
• نحن ما عاوزين منو اكتر من كدا.
• حافز تسجيلو القادم في المريخ بعد ان تنتهي فترت قيده مع المريخ ..مفروض الهلال يتكفل بيها.
• علاءالدين يوسف ..الزول الما عندو شغلة بالكورة …جاب ليه قون في الهلال من مخازن السكر.
• قولوا لي عرفت كيف الهدف جاء في الهلال من مخازن السكر.
• بقول ليكم.
• الهدف قالوا كان معاه ربع رطل سكر.
• علاءالدين يوسف جاب قون في الهلال.
• ضفر…بدل مرة مرتين.
• موسى الزومة.
• راجي.
• رمضان عجب.
• بكري المدينة يصل مرمى الهلال ..يحذفوا ليه إجابة ويستعين بالجمهور ويطلب مساعدة صديق ويقدم ليه الحكم معونة ..بعد دا زولكم بغمض وبخت الكورة بره القون.
• تقول عاوز يسجل ليه (شريط كاسيت) ما عاوز يسجل ليه (هدف).
• انت يا بكري ..كنت زولنا ..ونحن عارفنك كويس.
• حافظنك.
• يعني الحركات دي ما تعملها لينا.
• ما تغش ناس مزمل ابوالقاسم ساكت…تشقلب ليهم في (بورتسودان)..وتجي في المباريات الكبيرة تتلفت.
• ممكن بكري المدينة الليلة يغشكم ويتشقلب ليكم امام الرابطة.
• لكن ساعة الحوبة ما بتلقوه.
• نحن عارفنك ..وعارفين كورتك بتتمها (شقلبة) في المباريات الخفيفة.
• في الهلال كنا شايلنك بي ناس بشّة وكاريكا ونزار حامد.
• في المريخ البيشيلك منو؟.
• بلة جابر!.
• راجي عبدالعاطي!.
• هو راجي لي نفسو ما قادر يعمل حاجة.
• علي جعفر ..زولكم البتلفت المباراة كلها ..وساعة نظرو يقع ليه في (حكم) بقوم يمشي يهرج فيه.
• زولكم بهرج المباراة كلها ..تقول رصيدو قطع.
• في الهلال يا بكري المدينة …ناس الهلال كلهم بقولوا ليك انت مهمتك في المباراة بس تضيع الكور.
• ما عاوزين منك اكتر من انك تضيع الكور.
• وكانت اضاعة الكور في الهلال في حد ذاتو (حرفة).
• كانت فن ..عشان كدا ..كان في الهلال عندك قيمة.
• في الهلال كانوا بقولوا ليك الاقوان خليها بيجيبوها ناس بشه وكاريكا ومحمد عبدالرحمن.
• في المريخ ما بقبلوا ليك بالوضع دا.
• لأنهم كلهم متلك.
• كلهم (عنكبة).
• وانت قابض ليك (3) مليار.
• تفتكر الـ (3) مليار دي يا بكري المدينة منحوك ليها عشان تعمل ليك (صهريج).
• ادوك ليها عشان تعمل ليك (مدرسة).
• مستشفى.
• ابدا.
• القروش دي ادوك ليها عشان تجيب الاقوان.
• موضوع الكشافات دا ..ناس عنكبة كفيلين بيه.
• هي الكشافات ناقصة.
• الكشافات تستحمل منو وإلّا منو؟..عنكبة وإلّا بلة وإلّا بكري المدينة.
• قالوا ليك بكري المدينة بدوه الكورة وبقولوا ليه عندك خيارين ..يا تجيبها قون يا تجيبها قون.
• بكري المدينة بقول ليهم ما في خيار تالت.
• انا زول كشافات ساكت.
• الحاجة الما عارفنها انتوا ..قالوا اتير توماس قاصد يعطي بكري المدينة كورة هو والقون عشان يحرجو ليك قدام المريخاب ويكشفو.
• اتير توماس عارف الكلام.
• عارف بكري المدينة لو اديتو شوال كور ما بجيب ليه فيها كورة.
• زمان كانوا بقولوا ليك الزول دا قرايتو قراية مساء.
• والكلام كان واقع لينا بلحيل.
• اول مرة نعرف ان الكورة برضو فيها كورة مساء.
• انت يا بكري المدينة الـ (3) مليار الادوك ليها ناس المريخ فيها مليار ونص (قصب).
• طيب مالك يا بكري؟.
• تشيل وتضيع في الفرص.
• لكن المشكلة ما في المريخ.
• ولا في اعلام المريخ.
• المشكلة فينا نحن.
• انتو عارفين نحن قعدنا (نتراشق) في الكتابة عن بكري المدينة عندما كان بيلعب في الهلال …لمن المريخاب قاموا صدقوا.
• انتو ما عارفين اعلام الهلال.
• اعلام مقنع ..ولا بتصاقع.
• هسع اعلام الهلال الرفع ليهم بكري السماء ..كشفوا ليهم.
• ختاهو في الواطة.
• انتو يغشوكم كدا.
• عشان كدا اي لاعب في الهلال ..ناس المريخ جاريين وراه.
• المرة دي غشيناكم.
• خدعناكم.
• تستاهلوا عشان ما تجروا ساي.
• فتحوا.
• بعدين يا جماعة ..السر في الهلال في (الفانلة)..في اللون الازرق.
• في السماوي.
• في اللون الابيض.
• الموضوع ما هبتلي ساي كدا.
• هسع انتو براكم ما اقتنعتوا.
• ما شفتوا فيصل موسى بيعمل في شنو؟.
• زولكم دا ما فاضل ليه إلّا يفتح ليه مكتب هندسي في شارع المطار.
• ……..
• ملحوظة : اها بعد كدا ..(كيبي) دا كيف معاكم؟.
هوامش
• الاسبوع الاول للممتاز بدون تلفزة.
• وبدون رعاية كمان.
• دي زي كورس الملاريا ..لمن يقولوا ليك اول مرة تبلع (4) حبات دفعة واحدة.
• تبلعها قبلك.
• نحن بلعنا الاسبوع الاول.
• مريخ كوستي عاد من الفاشر بنقطة.
• والرابطة كوستي ..يفترض ان تفعل نفس الشيء اليوم.
• بكري المدينة الليلة بغش ليك المريخاب ..وبقوم يتشقلب ليهم.
• والمريخاب بصدقوا.
• انت ادوك (3) مليار جنيه ..عشان تتشقلب بيها قدام الرابطة.
• درع الاستقلال دا مالو؟.
• ما عاجبك.
• الهلال والاهلي شندي قمة الممتاز الحقيقية.
• والهلال والخرطوم الوطني ..مباراة ايضا ح يكون فيها كل القوة.
• المريخ خلاص ..طلع من المنافسة.
• ح ينافس السنة دي من اجل …البقاء في المنطقة الدافئة.
• جمال سالم ..ما في مباراة بطلع فيها بشبكة نظيفة.
• كلو بيصل مرمى المريخ.
• ……….
• عاجل : الفيفا ح تقول لينا ..انتو مفروض تشكروا ناس المريخ صدرتوا ليهم (المغصة) بي كشافاتها.
ليست هناك تعليقات:
إرسال تعليق