وان طال السفر | محمد عبد الماجد | الدون مدثر كاريكا والبرغوث فيصل موسى
- يا ربي ناس زيورخ ديل عندهم (عدس)....ما اظن – (ما تحرجنا ساكت)
- الألمان تلقوا (الباسطة) الفراحنين بيها دي – عندهم رأي فوقها
- لكن الدون مدثر كاريكا لو فاز بالكورة الذهبية ..ناس ضفر ديل إلا يفتحوا ليهم مطاعم في السوق الشعبي
- فيصل موسى ماشي على طريق نصرالدين الشغيل ..إعادة تنظيم
- أمس جلسنا – نتابع في حفل توزيع جوائز عام 2014م في زيورخ.
- زيورخ شوارعها (نظيفة) بشكل.
- النظافة ظاهرة في الجوائز.
- ديل (نضيفين) جنس نضافة.
- يا ربي ناس زيورخ ديل عندهم (عدس).
- ما اظن – (ما تحرجنا ساكت).
- العدس يكونوا ولا بعرفوه...ولا بكونوا سمعوا بيه.
- عدس شنو كمان البعرفوه ناس زيورخ؟.
- يبقى فرقهم مننا شنو لو كانوا بعرفوا (العدس)؟.
- العدس دا انا عندي معاه تار بايت...اصلو ما بخليه.
- ديل تلقاهم (طعمية) ما عندهم.
- تلقوا (الباسطة) الفراحنين بيها دي – عندهم فوقها رأي.
- يا زول طعمية كيف ما عندهم؟ – لو ما عندهم طعمية ..طلابهم بيحشوا ليهم بي شنو؟.
- اينما وجد الطلاب وجدت (الطعمية).
- لكن طلاب زيورخ ديل ظاهر عليهم ناس (جبنة مضفرة) ساكت.
- الممثلة سامية عبدالـلـه عندها قصة شهيرة مع (الجبنة المضفرة) ان شاءالـلـه سوف نحكيها ليكم بكرة في (من الغلاف للغلاف).
- قعدنا نحضر في حفل الفيفا.
- ناس جُداد...طالعين من علبهم.
- يلمعوا زي صحانة الصيني.
- الناس ديل طالعين من وين؟.
- قدر ما فتشت في الضيوف – قلت القى الدكتور كمال شداد قاعد – ما لقيتو.
- مفروض شداد يكون هناك ..هو الوحيد البيستاهل يكون مع الجماعة ديك.
- عندو نظام زي نظامهم.
- وعلمو زي علمهم.
- وفهمو زي فهمهم.
- عشان كدا شداد يستحق ان يكون هناك في زيورخ مع جوزيف سيب بلاتر.
- ناس اسامة عطا المنان ديل ..(قري) مفروض ما يصلوها.
- كتيرة عليهم.
- خلوها زيورخ.
- ناس مجدي شمس الدين حدهم (ابوحمامة).
- تاني (شبر) ما بنزيدكم.
- اتذكرت.
- مرة مشيت لي دكان ..قلت ليه في جبنة.
- قال لي : لا.
- طيب مالك منفوخ كدا – انا سألتك من دستور السودان!!.
- قلت ليه في طحنية؟.
- قال لي لا.
- عينو ما عاوز يرفعها ..تقول بنشيل منو الحاجات دي بدون قروش.
- قلت ليه في دقيق سيقا؟.
- قال لي لا.
- لا دا بقا يكون قاصدنا.
- قلت ليه في بسكويت؟.
- قال لي لا.
- في ستين.
- قلت ليه في زيت؟.
- قال لي لا.
- قلت ليه طيب اديني (7) حبات بندول ومعاهن موية صحة.
- قال لي البندول موجود ..لكن موية الصحة مافي.
- اشمعنا البندول موجود.
- قلت ليه ما مشكلة البندول (بسفو)...بعدين انت ما تقول لي من قبيل انا واقف قدام (صيدلي) ما واقف لي قدام صاحب دكان.
- اي حاجة ما عندك.
- نرجع الى (زيورخ).
- الكلام دا خليه.
- انسى.
- يمكن نطلع لينا بي جائزة.
- ان شاءالـلـه (رصيد).
- يمكن نطلع بي جائزة (الطالب المثالي).
- طبعا كجنتي في الدنيا جائزة (الطالب المثالي).
- الغريبة قدر ما حرسنا (تلفوناتنا) في جوائز شركات الاتصالات – عشان نطلع لينا بي جائزة – ما طلعنا بي حاجة.
- ما في ولا رنه.
- جوائزكم دي ظاهر عليها دعاية ساكت.
- لا حصل فزنا بيها.
- ولا بنعرف زول من اهلنا او من الجيران فاز بيها.
- اصلو ما حصل قابلنا زول في حياتنا العريضة دي وقال لينا فزت بجائزة من شركة اتصالات.
- زي الفاتح جبرا – قال اي زول يلاقيك يقول ليك انا شغال في الحكومة.
- مائة الف واحد يلاقوك في اليوم يقولوا ليك شغالين في الحكومة.
- المائة الف واحد ديل ما فيهم واحد من اهلنا.
- ولا واحد من الحلة.
- ولا واحد بنعرفو.
- الحكومة بتجيب الناس ديل من وين؟.
- وبتشغلهم كيف؟.
- الحكومة بقت تشغل البنقالة.
- اصلو ما عندنا زي ما بقول الفاتح جبرا واحد قريبنا شغال في الحكومة.
- هسع جوائز شركات الاتصالات البعلنو عنها في التلفزيونات والجرايد ما فيها فائز واحد بنعرفو.
- يجيبوا ليك اسم كدا لا في السما ولا في الارض.
- ويقولوا ليك مبروك ..ويخموك بالزغاريد ..والصفقة.
- ما عندنا زول بنعرفو يا كافي البلاء فاز ليهو بي جائزة.
- ويومك البتشوف ناس شركات الاتصالات قاعدين يوزعوا في الجوائز تقول الناس ديل بوزعو من طرف.
- لمن تشك في تلفونك.
- كلام.
- نرجع لي زيورخ.
- قدر ما اطلع – برجع ليكم تاني ..ما تخافوا.
- بنتفرج في حفل الفيفا ...تقول (عقد)...عاوزين نشوف الجا منو والما جا منو؟.
- في ناس لحاظة.
- لحاظة شديد.
- زيورخ كان فيها جنس برد.
- نحن في تلفزيوناتنا قاعدين نرجف من البرد.
- البرد ظاهر ..ما عاوز ليه شدة.
- وكمان لو ما بخاف الكضب ...(المكيفات) في قاعة الاحتفال في زيورخ كانت شغالة.
- الناس ديل جنو؟.
- الناس ديل ما عندهم رأس؟.
- نحن لو عندنا زول مشارك في هذا الاحتفال – كان (البرد) كتلو.
- الـلـه شافنا بس.
- يا زول البرد دا ما برد جوائز.
- لكن مع (بردنا) دا خلونا نحلم.
- كمان الحلم عاوزين تمنعونا ليه.
- الحكومة الى الان ما منعت الحلم.
- وكتر خيرها وبارك الـلـه فيها – الحكومة ما عملت اي رسوم على (الحلم).
- تحلم زي ما عاوز ..ما في زول بيسألك.
- لكن في الحلم في حتات محجوزة.
- ما في زول يمشي عليها.
- يعني جميع الاراضي الموجودة في الصافية والمنشية ومدنية النيل والمهندسين ..الخ ليس من حقك ان تحلم بي (شبر) منها.
- احلم بي من (صالحة) وانت ماشي على المطار الجديد.
- الوزارات ...المناصب الكبيرة ديك ..ولا تفكر فيها.
- كمان انت ما تبالغ في (احلامك).
- يعني خلى احلامك معقولة.
- ما تشطح وتحلم ليك بي (فرخة) مشوية...دي الحكومة ما بتقدر عليها ولا عندها ميزانية للحاجات دي.
- لكن الفول دا ..معاك فيه لغاية (الجبنة).
- يا زول لو قلبت ليك فيه (طلب كبدة) زول بسألك ما في.
- السمك – ما تحرج نفسك وتحلم بيه ساكت.
- لكن في الرياضة – افتكر من حقنا نحلم.
- نحلم زي ما عاوزين.
- ما في زول بقدر يقول لينا حاجة.
- هسع عليكم الـلـه لو من باب (الانصاف) كدا ..عملنا لخبطة مع الالقاب.
- نصلح كورتنا دي شوية في ناحية (الالقاب) دي.
- قمنا عملنا شنو؟.
- جبنا القاب نجوم الدوريات الاوروبية وجبنا القاب كورتنا السودانية.
- وعملنا (خج).
- خج زي البعملوه في الانتخابات.
- مالكم بتعاينوا لي كدا؟...مالها عيونكم بقت حمراء كدا؟.
- في اللخبطة دي ..مدثر كاريكا قام طلع لينا (الدون).
- وفيصل موسى طلع لينا (البرغوث).
- خلوا ناس (ميسي) يشوف ليهم ألقاب تانية.
- رونالدو لقبو يصبح (الجقر).
- ميسي لقبو يبقى (عنكبة).
- مالكم يا جماعة بتعاينوا لي كدا ..الكلام دا (لخبطة) القاب ساكت؟.
- انتوا فاكرين مشكلتنا شنو في الكورة؟.
- انتوا قايلين مشكلتنا الملاعب او الاضاءة.
- نحن مشكلتنا الالقاب دي.
- وكمان يقوم كدا الدون مدثر كاريكا يفوز ليك بجائزة الكورة الذهبية.
- هسع عليكم الـلـه العمائل البعمل فيها الدون مدثر كاريكا دا رونالدو في برشلونة بيعملها.
- وفيصل موسى عشان زول صغير ..وقصير ومكير ...هو (البرغوث).
- ناس المريخ خلوهم في (عنكبتهم) وجوز بلة جابر.
- لكن الدون مدثر كاريكا لو فاز بالكورة الذهبية ..ناس ضفر ديل إلا يفتحوا ليهم مطاعم في السوق الشعبي.
- بقية الجوائز ممكن ندي فيها ناس المريخ فرصة.
- احسن مدرب في العالم (برهان تية) – كيتا على غارزيتو.
- جائزة بوشكاش لمحمد عبدالمنعم عنكبة.
- كدا نكون رضينا على المريخاب.
- عشان ما يعترضوا ويقولوا حاجة.
- .......
- ملحوظة : هو ذاتو الكورة في البرد دا – لا في داعي ليها ولا حاجة.
- البرغوث امس سجل اول اهدافه.
- والبرغوث عندو كلام في مباراة الاستقلال.
- فيصل موسى سجل في مباراة الهلال امس.
- فيصل موسى على ما يبدو ماشى على طريق نصرالدين الشغيل.
- فيصل موسى عمل اعادة تنظيم.
- الهلال اصلا كدا برتب الحاجات.
- الدون مدثر كاريكا برضو سجل هدف.
- امس اول هدف تستقلبه شباك الهلال.
- الجديد ان الهلال كان متأخر وعاد في الشوط الثاني وسجل ثلاثة اهداف.
- شفتوا شغل المدربين كيف؟.
- خلاص المدرب البلجيكي اخد عشرة من عشرة.
- نجح في شوط المدربين.
- نشوف الجماعة ديل يوم الجمعة ح يعملوا شنو؟.
- ..........
- عاجل : لجنة الاستئنافات ..وكأنك يا زيد ما غزيت...وكأنك يا كاردينال ما اشتكيت.
ليست هناك تعليقات:
إرسال تعليق