وان طال السفر | محمد عبد الماجد | ناس عنكبة الإستقلال في (الإنشاء) كان عندهم معاه مشكلة في (القمة) كيف؟
- الفصل كلو كان بيقيف على فد رجل...الانفاس ممنوعة - النظر في السقف – والنخرة عاملة زاوية قائمة
- انتوا نزار الصاقعة دا عندو علاقة بي شرحبيل احمد؟ ..عشان البعمل فيه نزار الأيامات دي عندو علاقة بالجاز؟
- واحد قرفان شديد ..قال الانجليز ديل لو كان قعدوا لغاية سنة سبعين ..كان (ليفربول) دا بقى نادي من أندية بحري
- البرغوث فيصل موسى يعاين في حتة ويلعب الكورة في حتة ما عندها اي علاقة بالحتة الكتبتها ليكم دي
- زمان – ايام الاستاذ كان بدخل حصة العربي شايل ليه (ربطة) حطب ..ولابس ليه قميص اخضر.
- الفصل كلو كان بقيف على فد رجل...الانفاس ممنوعة - النظر في السقف – والنخرة عاملة زاوية قائمة.
- كنا نتقسم على اتنين.
- طلاب يركزوا في القميص الاخضر.
- وطلاب بركزوا في ربطة الحطب.
- والرجفة كانت بتظهر في الشبابيك.
- تلقى شباك الفصل منو وليهو كدا بيخبط في الحيطة.
- ليه شبابيك الفصول دائما عندها زي (الحركات) دي؟.
- في حصة اللغة العربية شباك الفصل بتلقاه بيخبط في الحيطة.
- الكلام دا بيحصل في اي مدرسة.
- في حصة الرياضيات الشباك بتلقاه مقفول.
- في حصة العلوم الشباك بكون مفتوح بين – بين.
- في حصة الجغرافيا ..الشباك بتلقى ضلفة فاتحة وضلفة مقفولة.
- في اي حصة (الشباك) بكون عندو حركة معينة.
- يمكن تفسير هذه الاشياء ..طالع من الدعم (اللجوستي) للشباك.
- ما تقولوا انا بتكلم ليكم ساكت.
- الكلام دا عندو علاقة بي زمن الحصة ووقتها.
- يعني في حصة الرياضيات ..عشان الدنيا بتكون برد ..واليوم الدراسي يا دوب ..طبيعي الشباك يكون مقفول.
- الطلبة نعسانين
- في حصة العربي ...(الهواء) بكون شديد شوية ..ومن الطبيعي الشباك يشيل ويخبط في الحيطة.
- حصة العلوم ..بكون حصل (ترخيمة) كدا بعد الفطور ..عشان كدا الشباك بكون مفتوح بين – بين.
- في حصة الجغرافيا الطلاب بكونوا فكروا في البيوت ..عشان كدا الشباك بتلقى ضلفة فاتحة فيه وضلفة مقفولة.
- نظام شنو؟.
- نظام الطلاب بتستعد للبيوت.
- عشان كدا ضلفة بتكون مفتوحة ..وضلفة مقفولة.
- اول ما جرس البيوت يضرب..الضلفة المفتوحة يقفلوها ..ونتخارج على كدا.
- الفرحة مقسمة في عيونا على الشوارع.
- زي كأنو تاني ما في مدرسة.
- استاذ اللغة العربية كان وقت يدخل الفصل ..ويخت المسطرة والطابشيرة في التربيزة قدام ويكتب التاريخ اعلى السبورة..كنا بنعرف ليك الليلة يوم (الانشاء).
- شوية كدا – الاستاذ يقول طلعوا كراريس الانشاء.
- نطلع الكراريس ..يدونا ليك محاضرة في الانشاء السابقة.
- الطالب الكتب ..والطالب الما كتب.
- الطلع من الموضوع ..وقال للاستاذ يا استاذ انا جمعت كرّاسي ما جاني تاني.
- حركات طلاب.
- عارفنها نحن.
- نص الحصة بتروح في الكلام دا.
- بعدها حسب الموسم بتكون الانشاء.
- يعني في الخريف ..بقولوا لينا اكتبوا انشاء عن فصل الخريف.
- الطلاب يتجدعوا ليك.
- في المولد..بقولوا ليك اكتبوا موضع في الانشاء عن المولد النبوي الشريف.
- في رأس السنة بقولوا لينا اكتبوا موضوع عن استقلال السودان.
- بنتقطع كنا.
- لا بنخلى أحمد محمد صالح ..ولا بنخلي الزعيم اسماعيل الازهري ..لا مبارك زروق.
- لا السيد عبدالرحمن ولا السيد علي الميرغني.
- نقعد نبحت في الرأس دا ..لمن نجيب مشهد الاستقلال في كراسة الانشاء.
- الموضوع واحد.
- اظنو بتكرر الى الان بين طلاب المدارس.
- اكيد في هذه الايام ..الطلاب كلهم بيكتبوا في موضوع انشاء عن الاستقلال.
- يمكن علاقة الطلاب بالاستقلال...في الانشاء بس.
- الغريبة ان تاريخ السودان في المقررات الدراسية حدو 1 يناير 1956م.
- يجي اليوم دا وبنقيف.
- بل في مقراراتنا الدراسية التاريخية ما في سيرة للتضيحيات التى حدثت قبل الاستقلال بصورة واضحة وتفصيلية.
- وكيف اتحقق الاستقلال.
- كلها حاجات من فوق لي فوق.
- بنلمس المواضيع ساكت.
- هبيش بس.
- ما عارف ليه المقررات الدراسية في كل المراحل التعليمية اهملت موضوع الاستقلال دا.
- واتعاملت مع الموضوع على كونه انشاء فقط.
- هسع الاجيال الجديدة ما بتعرف حاجة عن اسماعيل الازهري.
- كل الذي بيعرفوه بقولوا ليك ورفع اسماعيل الازهري علم السودان..يجيبوا ليك الصورة في التلفزيون ..ومحمد وردي بيغني في (اليوم نرفع راية استقلالنا).
- اتظلم استقلال السودان.
- واتظلم اسماعيل الازهري وكل الذين قدموا الكثير من اجل استقلال السودان.
- عشان كدا ..نحن الى الان بنقول الانجليز استعجلوا ..كان يقعدوا شوية.
- يقعدوا يعملوا شنو؟.
- واحد قرفان شديد ..قال الانجليز ديل لو كان قعدوا لغاية سنة سبعين ..كان ليفربول دا بقى نادي من اندية بحري.
- كدا يعني.
- المهم نحن محتاجين نبدل من تعاملنا مع الاستقلال.
- مفروض نغير فهمنا.
- عشان الاستقلال حدث في الورق فقط.
- لا درسناه ..ولا اتعلمنا من دروسه.
- اقصى حاجة ممكن نعمله ..كان بقولوا لينا اكتبوا موضوع في الانشاء عن الاستقلال.
- تتخيلوا مع هذا الفقر الاستقلالي الذي نعاني منه ..كانوا في طلاب بضايقوا في موضوع الانشاء دا.
- ما بعرفوا يعملوا شنو؟.
- رأسهم يضرب وقت يقولوا ليهم اكتبوا موضوع عن (الاستقلال).
- وكانوا ولا بعرفوا.
- يتخيل لي الطلبة الكانوا بضايقوا من الكلام دا ..كان ناس عنكبة وبكري المدينة وضفر.
- نسيت زول.
- عارفنو منو؟.
- بلة جابر طبعا.
- ناس بكري المدينة وعنكبة وضفر وبلة جابر ..كان موضوع الانشاء وقت يكون عن (الاستقلال) بضايقوا.
- وما بعرفوا يعملوا شنو؟.
- قالوا ليك عنبكة وقت يقولوا ليه اكتب موضوع انشاء عن (الاستقلال) بكتب ليهم موضوع عن سكر عسلاية.
- بقولوا ليه يا عنكبة ..الموضوع دا ما عندو علاقة بالاستقلال.
- عنبكة بقول ليهم ..القال ليكم منو ما عندو علاقة؟ ..انا عندي استقلال السودان زي السكر.
- زي سكر العسلاية.
- ناس عنكبة وبكري وضفر وبلة جابر ديل الجماعة البرفعوا ايدهم في حصة الانشاء.
- استاذ الانشاء بقول ليهم ..مالكم ؟..في شنو؟.
- بقولوا ليه يا استاذ نحن جمعنا كراساتنا وما جاتنا.
- الاستاذ بعرفهم ..بتاعين استهبال ..بقول ليهم انتوا كراساتكم جمعتوها وين؟..في الهيئة القومية للمياه...كيف يعني جمعتوا كراساتكم وما جاتكم ...اطلعوا لي برة.
- يطلعوا برة ..يقول ليهم امشوا جيبوا لي عصا غليظة ..عشان نشوف الكراسات دي مشت وين؟.
- اها يا جماعة – الجماعة البجهجهم ليكم موضوع انشاء في الاستقلال ..تفتكروا بقدروا يلعبوا ليكم قمة الاستقلال.
- ديل انشاء ساكت بتجهجهم.
- مباراة كيف؟.
- ناس عنكبة في الانشاء ما عندهم حضور في (الاستقلال) تفتكروا يحضروا ليكم مع ناس نزار الصاقعة.
- ناس البرغوث فيصل موسى.
- ديل لا بتصاقعوا ولا حاجة.
- ولا بتقدروا.
- الايامات دي نزار الصاقعة بعمل في عمائل ..تقول شايل ليه (جيتار).
- قولوا ما شاءاللـه.
- انتوا نزار حامد دا عندو علاقة بي شرحبيل احمد؟ ..عشان البعمل فيه نزار الايامات دي عندو علاقة بالجاز؟.
- والعجب البرغوث فيصل موسى.
- فيصل موسى يعاين في حتة ويلعب الكورة في حتة ما عندها اي علاقة بالحتة الكتبتها ليكم دي.
- غايتو قمة الاستقلال ..لو ناس عنكبة وبكري وبلة وضفر رفعوا ايديهم وقالوا كراساتنا راحت ..ما في زول يسأل منهم.
- يعملوا ليكم شنو؟.
- الاستقلال دا حقنا.
- الزول الرفع العلم يوم الاستقلال ..هلالابي.
- اسماعيل الازهري هلالابي قالوا..عندكم شنو انتوا في الاستقلال؟.
- يوم 24 الما عندو كراس ما يجينا يلافح ساكت.
- ........
- ملحوظة : هسع تلقى في جماعة شالوا هم.
- قبل كل شيء.
- لا بد لنا ان نشيد بمظهر الهلال.
- منتهى الاناقة.
- مظهر جميل وانيق في المطار.
- مظهر جميل وانيق في التمارين.
- الزي في منتهى الروعة في المباريات.
- بل حتى ازياء التدريبات ..حاجة ما تخلص.
- الهلال اصبح في اناقة ريال مدريد.
- الثريا ظهرت.
- وقبل كل ذلك – لا بد من الاشادة باشرف الكاردينال ومجلس الهلال بصورة عامة على هذا المظهر الجميل الذي اصبح يظهر به الهلال.
- هذا هو الهلال الذي نريد.
- ولاعب الهلال يجب ان يتميز في كل شيء.
- الفرق واضح بين الهلال والاندية الاخرى.
- بل الفرق واضح حتى بين الهلال في هذا الموسم والهلال في المواسم الماضية.
- وهذا امر لا بد ان نشكر عليه الكاردينال.
- نتمنى ونسأل اللـه ان يتوافق هذا المظهر والشكل مع الجوهر والمضمون.
- وان كان الجواب بتعرف من عنوانه.
- وقد ظهر جواب الهلال امام الوصل.
- المريخ ترحاله الكثير وانتقاله من طقس الى طقس سوف ينعكس عليه سلبا خاصة في مباراة قمة الاستقلال وفي دور الـ 64.
- المريخ بدأ في القاهرة ثم عاد الى الخرطوم ثم سافر الى الدوحة...ثم عاد الى الخرطوم وسوف يغادر اليوم الى بورتسودان ليعود ويلعب امام الهلال يوم 24.
- اللخبطة دي شنو؟.
- ما اظن الهلال يحتاج الى مباراة ودية قبل قمة الاستقلال.
- قمة الاستقلال في الاساس هي تجربة اعدادية.
- وما محتاجة إعداد.
- ..........
- عاجل : بكري المدينة لو عارف (البدل) دي ما كان قطع الزلط ومشى العرضة جنوب.
ليست هناك تعليقات:
إرسال تعليق