وان طال السفر | محمد عبد الماجد | باريس سان جيرمان يراقب تحركات بله جابر في معسكر القاهرة
- قالوا ليك (سكسك) وقت كان بلعب في التحرير جاب ليك قون في ليفربول – ناس ليفربول الى الآن بتكلموا مع حكم الراية
- الجماعة جابوا ليهم ترمس وتسالي وفول سوداني وقنقر وقعدوا يكلمونا عن مواجهة المريخ لبايرن ميونخ الالماني
- بيليه بعد ان واجه الهلال طلع بعد المباراة غرفة اللاعبين من دائرة السنتر ما عارفها
- الامارات كلها اتخلعت... قالوا ناس ريال مدريد ديل ظهروا من وين؟
- الموسم الماضي في مثل هذا الوقت – احتفل المريخاب كثيرا بمواجهة فريق المريخ لفريق بايرن ميونخ الالماني.
- عملوا لينا موضوع.
- وقرروا الكلام دا في مقرر الجغرافيا لمرحلة الاساس.
- بايرن ميونخ تقول عاوزين يقابلوه في توشكي.
- او في (كرري).
- الزول وقت يكون رايحه ليه (فرحة) – بقعد يقطع ليه حاجات من رأسو.
- زي واحد كدا ..قالوا ليك مشى يفحص (السكر).
- شعر ليه بفتور كدا وتنمل في الاطراف ورغبة في تناول كميات كبيرة من السكريات مع الاحساس بالعطش.
- الكلام البقولوه في اعراض السكري داك.
- زولكم مشى يفحص – الدكتور قال ليه عندكم زول في الاسرة عندو سكري.
- الدكتور عاوز يشوف سكري الزول دا سكري وراثي وإلّا سكري عرضي ساكت.
- صاحبكم قال للدكتور – نحن يا دكتور ما عندنا زول في الاسرة عندو سكري لكن جدي الكبير قالوا المريخ جاب ليه سكري.
- الدكتور قال ليه بس – دي سكر وراثي.
- زولكم شهق ليك (15) شهقة كدا في الهوا ...وقال : واللـه انا كنت فاكر سكري ناس ضفر وبله وعلي جعفر ديل سكر (عرضي) ساكت – أهو طلع سكر وراثي.
- الغريبة جدي يا دكتور وقت ضربو السكري ناس بله جابر ديل كانوا مافيشين - في الحياة ما ظهرو.
- الدكتور قال ليه بله مافي لكن المريخ مافي (الدكتور هلالابي حاقد)..اي مريخابي يفحص عندو السكر يطلعو ليك عند سكر وراثي.
- بكتب ليه 7 صلائب ...تقول نمرة في امتحان الانشاء.
- سكرو جابو ليه المريخ.
- لكن هسع دا ما موضوعنا.
- ولا عاوز اقول ليكم فيه حاجة.
- ولا عندي قضية مع (السكر).
- السكر رطلو عمل كم؟.
- ان شاءاللـه يضربوا السكر كلو – ولمن الناس تسأل عن السكر يطلعوا ليهم في (دمهم).
- نحن الزيت طلع من (عينا).
- والسكر طلع في (دمنا).
- شفتوا اللخبطة دي كيف؟.
- يقولوا ليكم الكلام كدا – تقعدوا تقولي لي بله جابر.
- هسع بله جابر دخلو شنو بالموضوع دا؟.
- واللـه بله ما عندو اي علاقة بالموضوع.
- نحن ساكت شايلنها معاه.
- نرجع لي شنو؟.
- نرجع لي بايرن ميونخ.
- الجماعة جابوا ليهم ترمس وتسالي وفول سوداني وقنقر وقعدوا يكلمونا عن مواجهة المريخ لبايرن ميونخ الالماني.
- قلنا ليهم الكلام دا عادي.
- ما فيه حاجة صعبة.
- سانتوس البرازيلي لعب امام الهلال في الخرطوم قبل عشرات السنوات – (يعني شنو؟).
- وبيليه بعد ان واجه الهلال طلع بعد المباراة غرفة اللاعبين من دائرة السنتر ما عارفها.
- ولا قادر يفرق بيناتهم.
- طلع (ملخبط).
- وليفربول لمن كان في مجده في سنوات عظمته وايام عهده الذهبي جاء لعب امام منتخب الخرطوم ورجع.
- قالوا ليك (سكسك) وقت كان بلعب في التحرير جاب ليك قون في ليفربول – ناس ليفربول الى الآن بتكلموا مع حكم الراية.
- ما فاهمين اي حاجة.
- بعد الحاجات دي ونحن في القرن الواحد وعشرين – ناس المريخ فرحانين بمواجهة بايرن ميونخ.
- مشوا قابلوا بايرن ميونخ ..ورجعوا يحجوا للناس بالقصة.
- مفتكرين الموضوع زي سد مروي.
- شبكونا ليك السد – السد.
- ما شفنا اي حاجة.
- اقصد شبكونا ليك بارين ميونخ – بايرن ميونخ.
- شبكونا ليك زي ما قعدوا يعملوا الآن مع باريس سان جيرمان.
- قالوا موقع بايرن ميونخ يستعرض مواجهة الفريق للمريخ.
- والالمان ...المريخ لا بعرفو فريق ولا بعرفو شارع.
- ما عندهم قضية.
- يقبضوا دولاراتهم دي – بعد كدا لو قالوا ليهم ألعبوا مع (الكبري الجديد) بلعبوا ما عندهم اي مشكلة.
- المريخ دفع من خزينة الدولة مليون دولار من اجل مواجهة بايرن ميونخ.
- هسع عليكم اللـه المليون دولار دا بتعمل كم مدينة رياضية؟.
- بتعمل ليها كم عنبر حوادث؟.
- كم صهريج؟.
- الدولارات لو كانت مدفوعة من خزينة المريخ كنا قلنا ونحن مالنا.
- لكن الدولارات مدفوعة من قروش الدولة.
- كمان نحن ما بنعرف دولارات الدولة من دولارات المريخ.
- المريخ لعب امام بايرن ميونخ ....ورجعوا فرحانين – عشان بارين ميونخ غلبهم اتنين بس.
- وجماعتكم (كورنر) ما طلعوا بيه.
- ولا كورنر.
- لعبوا (90) دقيقة ما طلعوا بي كورنر واحد.
- الجدعة الطلعوا بيها من المباراة – بله جابر جدعها غلط.
- وبعد دا ..الفريق الذي لعب امام بايرن ميونخ كلو اتفرتك.
- موسى الزومة مشى الاهلي.
- ومرتضي كبير ...اتخارج مشى مريخ الفاشر ما عارف الرابطة كوستي.
- وشيلمس مشي بتروجيت المصري.
- كروجر قدم استقالته.
- ابراهومة مشى الرابطة.
- الفريق كلو اتفرتك.
- اليفيه ودع.
- باسكال مشى (عزام).
- خلاص باسكال عاوز يبقى بتاع (مناسبات).
- لقط (الكروت) كلها ومشى (عزام).
- باسكال ح يكون انجح بتاع مناسبات في تنزانيا.
- الفريق الذي لعب امام بايرن ميونخ كلو اتفرتك...لم يبق منه غير بله جابر وعنكبة.
- هيثم مصطفى جاء بعد مباراة بايرن ميونخ وقعد في البيت.
- قال ديل لا بلعب معاهم ولا حاجة.
- اها بعد القومة دي – وبعد التنظير دا كلو.
- بعد المليون دولار – المريخ جاء وطلع من التمهيدي.
- شفتوا الزول البركب ليه في حافلة وبقعد ليه في آخر مقعد..ويقوم ينزل في اول محطة.
- يقوم ليك ناس الحافلة كلها عشان ينزل.
- عملية الزول دا – عملها المريخ السنة الفاتت.
- عمل ليه معسكر شهر في قطر.
- ولعب امام بايرن ميونخ.
- ولعب امام الوحدات.
- وفريق روسي.
- وفريق ايراني ..
- وجوا بعد دا كلو وطلعوا من دور الـ(64).
- في زول بعد العملية العملها المريخ دي – بطلع من (التمهيدي).
- هسع ناس المريخ عاوزين يعملوا نفس الحركة.
- نفس العملية.
- الجماعة تاني قاموا جابوا سيرة باريس سان جيرمان.
- تاني عاوزين يتفرتكوا.
- عاوزين يطلعوا تاني من دور الـ (64).
- تاني ح نرجع لموضوع (التمهيدي).
- والكلام الما بتقبوله داك.
- ولا بتستحملوا.
- السنة الماضية وضعوا صورة ريبيري مع صورة هيثم مصطفى.
- هسع المريخ وضعوا صورة إبراهيموفيتش مع صورة ايمن سعيد.
- ايمن سعيد ما صدق.
- في مصر ايمن سعيد ابراهيموفيتش في التلفزيون ما بشوفو.
- ما عندو (كرت).
- اعمل ليه شنو انا؟.
- يشوفو ليكم بالعافية.
- على العموم يا مريخاب ..امشوا ألعبوا امام باريس سان جيرمان ..وتعالوا اطلعوا لينا من الدور التمهيدي.
- ...........
- ملحوظة : التمهيدي واللـه ما عاوز ليه تعب قدر تعبكم دا.
- الجهاز الفني لفريق باريس سان جيرمان قالوا برصد وبتابع في تحركات بله جابر في معسكر المريخ في القاهرة.
- عاوز يشوف الخطورة طالعة من وين؟.
- طبعا تصرف المدير الفني لفريق باريس سان جيرمان ..تصرف طبيعي.
- طبعا ما معقول ولا منطقي يكون المدير الفني لفريق باريس سان جيرمان عاوز يلعب امام المريخ ويقوم يتابع بشه.
- الطبيعي والمنطقي يتابع بله جابر.
- الظاهر بله جابر (جدعة) ما ح يطلع بيها من المباراة.
- يا كابتن شوف ليك رباط صليبي على خفيف كدا.
- اتخارج من المباراة دي.
- مالك ومال التلتلة دي.
- الامارات كلها اتخلعت.
- قالوا ناس ريال مدريد ديل ظهروا من وين؟.
- ناس ريال مدريد ديل انتوا لخبطوا وإلّا شنو؟.
- ناس ريال مدريد ديل يكونوا فاكرين بطولة كأس العالم للاندية في الامارات وليس في المغرب.
- الهلالاب خلعوا ليك ناس الامارات.
- مباريات الهلال الاعدادية في الامارات يجب ان تكون مباريات مع اندية صغيرة وليس كبيرة.
- التدرج في المباريات كويس.
- خاصة وان الهلال اصبح صاحب توليفة جديدة.
- ويجب التدرج في المباريات.
- ...........
- عاجل : الريح علي قالوا ليك في مصر عاوز يمشي السينما ...(صاحبكم جديد).
ليست هناك تعليقات:
إرسال تعليق