وان طال السفر | محمد عبد الماجد | زول (4 في 3 ) بتخلعو
- لمن يقولوا ليك والله ام بدة فيها مطرة – بيت واحد واقف فيها مافي ...من حقك (تتخلع)
- الدستور بسمح للزول يتخلع شريطة ألا تكون خلعتو دي منعكسة على اطراف اخرى
- مرات بقولوا ليك المخلوقة دي عندها (عيون) صغيرة خلاص – زي (آخر ظهور)
- عرفنا سجك الحمير وسجك الابقار النافقة ..كمان عاوزة تعمل لينا سجك من (البامية)
- في ناس في الحياة دي كأنهم جاءوا عشان (يتخلعو).
- مهمتهم في الحياة دي يتخلعو.
- يتخلعوا لينا ويرجعوا.
- ملأوا البلد (خلعة)...وطلعوا.
- اقل حاجة بتخلعهم.
- هم مخلوعين طبيعي.
- مخلوعين بالفطرة.
- في ناس كدا.
- يشوفوا اي شيء يتخلعوا.
- تقول ليهم اي حاجة – تلقاهم بدون ما يشعروا قعدوا واتخلعوا ليك.
- موش في ناس كدا بكونوا قاعدين برة شعورهم.
- تلقى حواسهم قاعدة برة في السهلة.
- في الحياة بتلقى ليك زول بعرّفوه ليك بـ (الهجمة).
- يقولوا ليك الزول (المهجوم) داك.
- طبعا في (خلعة) مبررة.
- يعني لمن يقولوا ليك والله ام بدة فيها مطرة – بيت واحد واقف فيها مافي ...من حقك (تتخلع).
- كمان الحكومة عاوز تمنعنا من (الخلعة).
- من حقك تتخلع زي ما عاوز.
- لمن يقولوا ليك ناس الطيب جاهم سيل ...(جدادة) ما خلاها ليهم.
- من حقك تتخلع.
- رغم ان الانسياب المنطقي للجدادة مع الخلعة ما بجي.
- لكن ساكت بقرب ليكم في المساحة.
- عزيزي المواطن من حقك (تتخلع).
- الدستور بسمح للزول يتخلع شريطة ألا تكون خلعتو دي منعكسة على اطراف اخرى.
- او عندها علاقة بالمعارضة.
- عاوز تتخلع – تتخلع هنا قبلك.
- اي خلعة برة بتعتبر مخالفة للقوانين الوطنية وبتعتبر خيانة.
- خيانة في حق الوطن.
- إلّا يقولوها ليكم عديل كدا.
- مستسهلين الموضوع – اي حاجة إلّا يقولوها ليكم عديل.
- ما عاوزين تبذلوا اي مجهود.
- زي زميلنا عمر ..بنقول ليه اعمل الفطور.
- بمشي يجيب لينا (فول) ..زي ما هو بجيبو يختو قدامنا.
- ما عاوز يبذل اي مجهود في الفول دا.
- يجيب ليك الفول سادة ..من قدرتو ..(ملحة) ما فيه
- بنقول ليه يا عمر صلح لينا الفول دا شوية.
- ابذل ليك مجهود شوية كدا في الفول.
- صلحو يا اخي.
- والله في ناس الفول دا بعملوا فيه عمايل..والله يشهوك الفول.
- لو ما عندك رغبة في الفول – بتجي تلقى نفسك سيدو وقت يجيبوه ليك.
- وفي ناس كمان من كسلهم – الفول يجيبوه ليك تقول (نار) ما دخلت عليه.
- كأنو من الحواشة للمستهلك.
- عشان كدا في (فول) بخلع.
- الخلعة ما شرط تكون من الحاجة الكعبة.
- في سماحة بتخلع.
- مرات بتتخلع من (السماحة).
- هسع الشعراء ديل – فاكرين كلامهم البكتبوه في الحب وفي الجمال دا من شنو؟.
- من (الخلعة) البقول ليكم عنها دي.
- يعني من الصباح برطن.
- من الصباح بتكلم ...وبنظر ليكم..ما خليت ليكم (فولة) واول ما اسألكم ..تكونوا ما عارفين.
- موش مرات بقولوا ليك والله الزولة دي عندها (عيون) متل موية رمضان.
- دي عيون بتخلع.
- ومرات بقولوا ليك المخلوقة دي عندها (عيون) صغيرة خلاص – زي (آخر ظهور).
- يعني عيون ما بتشاف.
- طبعا حسن الدابي هو اول من شبه العيون بـ (كشافات القطر).
- عندما غنى النعام آدم (والعيون كشافة القطر).
- وممكن هسع نقول العيون كشافة استاد الهلال.
- لكن القطر عندو كشافات ما بتقدر تعاين ليهن ..وهذا القصد من التشبيه عند حسن الدابي.
- المهم يا جماعة قصدت اقول ليكم (العيون) بتدخل ضمن عناصر (الخلعة).
- يعني عادي جدا تخلعك عيون.
- ولا تقدر تقول حاجة.
- في زول فيكم عاوز يقول شيء.
- الزول كل ما كان بسيط ..بتكون خلعتو اسهل.
- يعني ممكن واحد يمشي الجزارة ويسأل من كيلو الضان ...يقولوا ليه كيلو الضان بـ (80).
- يقوم زولكم يخلي اللحمة ويقعد يتخلع من السعر.
- وممكن نفس الزول يمشي الجزارة تاني يوم.
- وتاني يسأل من كيلو اللحمة.
- وتاني يقولوا ليه بـ (80) جنيه.
- موش مفروض الموضوع يكون بقى ليه عادي.
- تتصوروا ابدا.
- زولكم تاني بتخلع.
- اها عليكم الله في طيبة اكتر من كدا.
- في ناس اتعودوا على كدا.
- اتكيفوا على ان يتخلعوا من اي شيء.
- لو ما اتخلعوا بموتوا.
- بروحوا فيها.
- الواحد فيهم يمشي يفحص الملاريا – الدكتور يقول ليه عندك ملاريا.
- يقوم يتخلع ليك ..ويقول للدكتور لا يا اخي ...عليك الله الشيء اللعينة دي جاتني من وين؟.
- نفس الزول لو الدكتور قال ليه ما في ملاريا.
- بقوم زولكم برضو يتخلع ويقول للدكتور طيب يا دكتور دي لو ما ملاريا تكون شنو؟.
- الواحد يمشي البيت.
- اول ما يدخل (الشنطة) في الدولاب يقول للمرا – الليلة عاملة لينا شنو؟.
- تقول ليه : بامية مفروكة ..موش انت امس براك جبت البامية.
- زولكم يتخلع ليك من البامية المفروكة ويقول للمرا – انتي اصلو ما بتعرفي تعملي (مفاجآت).
- ما عندك مفاجأة – مفروض لمن اجيب ليك بامية مفروكة تتحرفني وتعملي لينا (سجك).
- المرا تقول ليه – عاد يا ود امي اتحرفن كيف؟...لو البامية بتبقى (سجك) ما كان كيلو السجك بقى بـ (60) جنيه.
- الغريب في الامر ...نفس الزول بعد اسبوع بجيب ليه بامية وبجي في اليوم التالي بعد باميتو دي يسأل من الغدا..وقت زوجتو تقول ليه عملت ليك من البامية (سجك) مفروك.
- اقصد (سجك) عديل كدا.
- زولكم بتفقع من (الخلعة).
- وممكن عديل كدا يموت فيها.
- ويقول ليها وين البامية المفروكة الليلة؟...انا جايب ليك بامية عشان تعملي لينا (سجك).
- عرفنا سجك الحمير وسجك الابقار النافقة ..كمان عاوزه تعملي لينا سجك من (البامية).
- قالوا ليك في ناس كدا عشاهم كلو يوم (شعيرية).
- الشعيرية عندهم ثابتة زي النشرة.
- من الساعة سبعة مساء بشدوا (شعيريتهم) دي.
- والاولاد بقولوا للحاجة ..يا حاجة والله شعيريتك دي ما عاوزة ليها حلة تشديها فيها.
- لو عملتيها لينا سندوتشات بتكون احسن.
- صاحبكم كل يوم برجع الساعة عشرة من الشغل ..بسأل من الباب – العشا شنو؟.
- بقولوا ليه (شعيرية).
- بقوم يتخلع ليكم.
- 355 يوم زولكم بتخلع من الشعيرية.
- مرة في السنة بغيروا من الشعيرية ويعملوا ليهم (حلبة).
- صاحبكم بجي ويسأل عن العشا.
- بقولوا ليه : الليلة حلبة يا حاج.
- زولكم بتخلع جنس خلعة.
- ام العيال بتقول للحاج ..والله يا حاج انا عشان خلعتك دي ..ما بحب اغير ليكم (الشعيرية).
- ابو العيال بقول ليها لكن يا حاجة انتي عاملة لينا (حلبة) وما عاوزني اتخلع.
- في حلتنا عندنا زول جنو (خلعة).
- كل ما المريخ يكون لاعب بقول لينا تشكيلة المريخ فيها منو؟.
- نقول ليه جمال سالم وعلي جعفر ضفر وامير كمال.
- بمشي كويس..اول ما نقول ليه وبلة جابر صاحبكم بتخلع لينا.
- يوم بلة جابر كان برة...قلنا ليه تشكيلة المريخ من غير بلة جابر.
- قال لينا بلة جابر الليلة برة.
- قلنا ليه في الكنبة بلة ما في.
- زولكم من قلنا ليه كدا قعد (اتخلع) لينا – وقال والله الليلة الله يستر بلة مافي.
- الناس اتعودوا على الخلعة.
- تمشي لبتاع البطيخ...تقول ليه البطيخة الكبيرة دي بي كم؟.
- يقول ليك بـ 40 جنيه ...تقوم تتخلع...وتقول مالها غالية كدا.
- نفس البطيخة تسأل منها بكرة يقولوا ليك بـ 15 جنيه ..برضو تتخلع وتقول مالها رخيسة كدا.
- نحن اتعودنا على كدا.
- اتعودنا نتخلع.
- بقينا في كل الظروف – كل الاحوال بنتخلع.
- عندنا زول في الحلة بقول ليك الليلة شنو؟.
- تقول ليه الليلة الاربعاء ..بقوم يتخلع ليك ويقول ليك ..الاسبوع دا مالو جاري كدا؟.
- نفس الزول يلاقيك يوم تاني ويقول ليك الليلة شنو؟.
- تقول ليه الليلة الاحد ..زولكم برضو يتخلع ويقول ليك ..الاسبوع دا مالو ماشي براحة كدا؟.
- في ناس لو قلت ليهم 4 في 3 بي 12 ..بقوموا يتخلعو ليك.
- عاوزين يتخلعو بس.
- ما عندهم شغلة غير (الخلعة).
- ....
- ملحوظة : واحد قالوا ليه الساعة 12 – اتخلع ليك و قال ليهم ما كتيرة.
- في ناس الى الان مخلعون من اعارة جمعة.
- ومن لعب الهلال في التمهيدي.
- ضفر قفلو ليه نفسو في القاهرة – قالوا ليه انت ح تقفل كروز.
- قال ليهم هو كروز ناس الهلال لحقو سجلوه.
- صاحبكم ما جايب اي خبر.
- ما متابع.
- ............
- عاجل : الزول وقت يتخلع مفروض يتخلع بأدب.
ليست هناك تعليقات:
إرسال تعليق